A Strina
A Strina
'Mpena arrivatu salùtu li mura
e ppua salùtu a vua, cara patruna.
(Rit.1) - Ohi fhà, ohi fhà;
-------- e la strina mi l'haj i fhà;
-------- si un mi fhai la strina,
-------- un mi mùaticu di ccà.
Fhammi la strina, ca mi suali fhari
chilla di Capudannu e di Natali.
(Rit.1)
Un è brigogna si cantu la strina:
a strina la cantau Gisù bambinu.
(Rit.1)
Fhammi sta strina e fhàmmila di fhicu,
mu ti sta bùanu stu biallu maritu.
(Rit.1)
Fhammi sta strina e fhàmmila di meli
mu ti sta bona sta bella mugghjeri.
(Rit.1)
Fhammi sta strina e fàmmila d'aranci,
mu ti sta bona sta fhigghja chi ciangi.
(Rit.1)
(- Variante "nomi del parentado")*
E di Fhrancischiallu* mi ndavia scurdatu
ch'era lu juri 'i lu parintatu.
(Rit.1)
Ammìanzu sta casa ci cantàu nu gallu,
'a rroba mu cci trasi ccu llu carru.
(Rit.1)
Chi Diu ti mandassi tantu granu,
quantu ndi fici Cutru e Curìgghjanu.
(Rit.1)
U Diu mu ti mandassi tantu vinu,
quanta acqua porta u jummi allu pindinu.
(Rit.1)
Ammianzu sta casa ci pendi 'na catina,
mu pùazzi fhari 'na fhigghja rigina.
Ammianzu sta casa ci pendi 'nu catu,
mu pùazzi fhari 'nu fhigghju abbucatu.
(Rit.1)
(- Variante "ritardo")
Un mi fhari vuttàri a Santu Rùaccu,
ca a nivi m'è arrivata allu dinùacchiu.
(Rit.2) - Ohi fhà, ohi fhà;
-------- cala priastu e un tardà
-------- ca tu la stina m'hai di fha
E un mi fhari vuttàri a Santu Vitu
ca a nivi m'è arrivata allu villicu.
(Rit.2) - Ohi fhà, ohi fhà;
-------- cala priastu e un tardà
-------- ca tu la stina m'hai di fha
(- Variante "si")
Viju 'na lucicella vascia, vascia,
criju ca mo' si ràpiri lla cascia!...
(Rit.1)
Sìantu lu sgrusciu di lu tavulatu
criju ca mo' mi scindi u vuccillatu.
(Rit.1)
Sìantu lu sgrusciu di lu manigghjuni,
criju ca mo' ni u scindi u buttigghjuni.
(Rit.1)
(- Variante "no")
Ammìanzu sta casa ci rullàu nu rùallu
mu ti putissi rùmpiri a nuci di u cùallu.
(Rit.1)
Ammianzu sta casa ci pendi nu fhusu,
mu putissi fhari nu fhigghju tignusu.
(Rit.1)
(- Formula finale)
E di nu grubbu mi fhujiu 'na gatta
e jamunindi ca 'a strina è fatta.
(a strina d'i fhruntari)
llhome
Home page | 
Imposta come pagina iniziale | 
Aggiungi a preferiti
grazie per aver visitato www.lametropolis.it
e-mail info@lametropolis.it
All lefts ®
reserved 2002 - 2005 - un'esclusiva Lametropolis
WeBlog-Content - references
www.lametropolis.it